الله عز وجل مش موجود

فلسفة وجود اله  ! ..

انا بحب اشك في كل حاجة لان الشك بيوّلد يقين وايمان اكبر،  شكيت في الدين اكتر من مرة وشكيت في سبب وجودنا وافترضت اننا اتخلقنا عبث ، واننا جينا الي هذه الدُنيا مُجبرين رغم انوفنا ، وان مكنش في ترتيب مسبق بينا وبين الله لحمل الحرية والارادة التي وهبها لنا ، كلها كانت فرضيات ووجدت اجاباتها لاحقاً بنور الهي ، بس الحاجة الوحيدة اللي كانت برة كل الشك هي فكرة عدم وجود اله ، لاني عمري مفكرت في حاجة زي دي ابداً ، ممكن اكفر واتمرد علي افعاله جهلاً مني به وبسبب عدم قربي له وعدم علمي بصفاته وحكمته وتدبيره ، لكن لا يمكنني انكاره  ، كنت مُدرك انه سبحانه برة الشك وان فكرة وجوده سبحانه ملهاش علاقة بالشك او العقل ، لها علاقة بالقلب ، القلب مبيفكرش والعقل مبيحسش ، يكفي ان تترك سفسطة الجدل والفلسفة العقلية والمنطق والهوي والعناد ، وتتبع فطرتك ، يكفي انك تتدبر في السيمفونية الكونية التي خلقها ، يكفي انك تشوف التناغم في خلقه ، مستحيل يكون دا كلُه صدفه ، من حقك تكفُر او تؤمن بالله لانه سبحانه اداك الارادة الحُرة ، عايز تضل او تتبع النور انتا حُر ، دا الاعجاز في خلق الانسان ، انه روحه منفوخ فيها من روح الله ، وعنده ارادة حرة ، زي ما تكون ارادة اله ، لكن انتا ازاي تجحد وتنكر اثاره اللي كل يوم بنشوفها حوالينا بس مش بنتفكّر ولا نتأمّل فيها ، ولا بناخد بالنا منها ،
بمناسبة اثاره بلاش نُدخل في الجدال المشهور والاسئلة اللي زي "ليه الظلم والعذاب موجود اذا كان الله موجود؟" ! ممكن اكتب موضوع خاص في الاشياء دي لاحقاً ، مع انك لو تفكرت هتلاقي الاجابة بنفسك ، انا بتكلم في نقطة تانية

طول عمري كنت ماشي بفلسفة الاحتمال والمحال ، ان دايما فيه احتمال لكل شيء في الوجود وان المُحال معدوم وان مفيش شيء مطلق او بمعني اخر مفيش مستحيل ولو طبقنا الفلسفة دي علي الاشياء الغيبية اللي احنا مؤمنين بيها من غير ما نشوفها هنلاقي نفسنا بنحتمل ان الله سبحانه وتعالي مش موجود وبالتالي هنفرض ان الكون موجود بذاته والوجود ملوش محرّك او خالق ودي كانت فلسفة انا مش مؤمن بيها بتقول “بما ان العدم معدوم اذن فالوجود ايضاً موجود” لكن انا بميل اكتر لفلسفة ارسطو اللي بتقول السبب الاول والمحرك الاول للوجود” بمعني وجوب السبب الاول او المحرّك ، ودا بيخلينا نروح بتفكيرنا انه من الضروري يكون في خالق للوجود او مُحرك له ، وبالتالي لو فرضت عدم وجود اله انتا كدة خليت فكرة الاله تقع تحت فلسفة او قانون ودا لا يصح منطقياً لان الله ليس موجود وايضا ليس معدوم ولا يقع تحت قانون ولا محكوم لانه هو السبب او الحقيقة الوحيدة في الوجود سبحانه بيحرك ويدبّر وبيخلق القوانين والاحكام ، الله قائم بذاته لا يخضع لقوانين فلسفية ولا كونية ولا يحكمه شيء وهو وحده سبحانه المُطلق الوحيد في الكون اللي بيوّجد وبيعدّم ولا يُوجد ولا يُعدم …
عزيزي الملحد دي مش دعوة للإيمان بالله لانك حر دي مجرد دعوة للشك في شكك …او انك تبص لفرضياتك ونظرياتك بشكل مختلف