بمناسبة عيد ميلادي وإني اتممت 22 سنة علي كوكب الارض ، حبيت احتفل مع نفسي وعلي طريقتي ، قولت لنفسي "يلا بينا نكتب اي حاجة" ...
طيب نكتب ايه يا نفسي ؟ ، قالتلي اكتب 22 شيء تعلمته خلال السنة الماضية ...
فقررت اكتب 22 معتقد ورأي وفكرة اؤمن بهم في الوقت الحالي ، اكتسبتها خلال رحلتي من 21 إلي 22 سنة ،، مش مؤمن بصواب المعتقدات دي كما اني مش مؤمن بخطئها ، المهم اني اخترت وشكلت افكاري بنفسي.. ارسطو قال يجب ان نتبع الدليل الي حيث يقودنا ، ولذلك هي قابلة للتغيير ، الدنيا رحلة وانا محتاج اشكّل مراحلها بنفسي ....فقررت ادوّنها لعل حد يستفيد من رحلتي القصيرة دي ..
خلال السنة الماضية تجردت من كل الموروثات والمعتقدات التي تربيت عليها وحاولت اعتناق الافكار التي توصلت لها بنفسي ، مما جعلني اُشكل عقيدة خاصة بي ، لذلك لا تحكم عليا بالهرطقة او التفاهة او السفسطة ..
عماتاً الخطاب هنا موجه لنفسي ، بكلمها ...
1- عن الايمان :
- بعد حيرة توصلت لحل مؤقت ، ايماني بأن مفيش حقيقة او نظرية كاملة بنسبة 100 % لا يتعارض مع ايماني بحقيقة عرفتها زي الموت مثلاً ، وقياساً علي ذلك ايماني واعتقادي بوجود "الله" دا يقين تام وتوحيد بيه بس انا عقلي لا يدركه ولا يعلم كيفية تدبيرُه للامور ويجهل حكمته ولا بأس بعبادة الله علي قدر علمك بيه .
- الانسان يكتب حياته بيده والله سبحانه لا يكتبها ولكن الانسان غير مسئول عن قَدَرُه ولا دخل له بالقضاء الالهي .
- لازت اعتقد ان الله سبحانه وتعالي يرانا ويعلم ما يحدث وما حدث وما سيحدث لانه خارج إطار الزمن ، ولكن بدون تدخّل في حياتنا وامورنا. بالرغم من ان التجربة بتقول ان كلما دعوت الله او سألته علي اي حاجة ..بتحصل وبتتحقق ! . ودا بيزيد حيرتي اكتر ، ورغم اني لسة مش لاقي تفسير للحادثة اللي دعيتو فيها ونجاني ، وهل لو مكنتش دعيته كان نجاني برضو ولا النتيجة كانت هتبقي مختلفة وهل دا معناه ان هو بيغيّر في حياتنا بشكل مُباشر ؟ ، طيب ازاي !؟
- الله محبة ورحمة مُطلقة..سيبك من الناس اللي حصرت الاله في ادوار الشر والانتقام والغضب وانه قاعد مستنيني اغلط عشان يعذبني .
- جهنم اتخلقت عشان ولاد الوسخة اللي طلعو عين ابونا في الكوكب دا ، مش عشان فني ...
- مش هعبد الله رغماً عني تاني ، ومش هصلّي خوفاً من النار ولا إبتغاء الجنة...ولكن حُباً في الله ..
- لازلت اجهل الجانب اللي بيخليني اخاف من الله . ولكن تعقيد الكون وعظمته ونظامه الابداعي بيخليني ابُص لله بنظرة اني مش فارق معاه انا وكل خطاياي . خوفي منه هو رهبة لسة ملقتلهاش وصف معين او طريقة اقدر اكتب بيها عنها ..
- مش مُعترف ولا مصدق بنسبة كبيرة في كتب السلف الصالح ولا قصص الصحابة ولا السيرة . ولكن لا اكذبها وكل من يصدقها لا شأن لي به ولا أسخر او اقلل من شأنه ..
- مش مقتنع بحاجة اسمها علوم الفقه والشريعة والسنة . ومش مُقتنع برجال الدين ...
- البخاري ومسلم مش اصح كتابين بعد القرآن وتملئهم الاسرائيليات . #حقيقة
- الاسلام من صنع البشر ، القرآن من صنع الله . #حقيقة هتجاوبلك علي اسئلة كتير جواك .
-اللهم اني بريء من دين بن تيمية ومحمد بن عبد الوهّاب ..
- الدين اسلوب حياة مش اكتر ، الاسلام مفهوم شامل ، والمفاهيم والمعاني والتعاليم في الإسلام هي مجرد إطار ممكن تحط جواه اي اعتقادات ومباديء وافكار وتبقي إسلامية ، كل ما هو خير بنية لله وحده يعتبر إسلام لوجه الله . متوجعوش دماغنا بقي بمفاهيم وكلمات زي "إسلامية" ، " وبما لا يخالف الشرع والشريعة " ، "وعلي سنة النبي" ...
- ان الله يربط روحك بيه بالشكل دا ، ويخليك تحبه ومتتعلقش غير بيه ، ومتستريحش غير معاه ، دا اسمو عذاب . لانك عمرك ما هتوصله . وقد يكون رحمة فيما بعد لما ابتدي اتخلي عن الدُنيا او افهمها اكتر ...
2 - في إعتقادي ان الله ممكن يكون مخبيلي حاجة جميلة ، مش شرط تسعدني ، لكن تخليني استمر في طريقي .
3 - انا ممكن اغيّر في مسار التاريخ .
4 - اوعي تحب تاني . علي الاقل في الفترة دي .
5 - لازم تتقبل القليل من الاسفاف الفني والثقافي من وقت للتاني في اوقات معينة ومع ناس معينة عشان الامور تمشي .
6 - افكاري مش متطرفة وهي في مرحلة تشكيل ، فكك من كلام الناس .
7 - كسم الفلوس
8 - مش لازم تهتم بمواضيع الحلال والحرام والفتن والذنوب والمعاصي ، الصراع الوجودي اللي انا فيه اكبر من الكلام دا كلو .
9 - عن العلاقات :
- تقبل فكرة الصداقة القائمة علي المصلحة ، ومفيش مُشكلة فيها .
- لسة في ناس بخير لسة في حُب وناس قلبها سليم ، لسة في نوع من البني ادمين بيحبو لمجرد الحب ، لسة في صداقة قائمة علي الحُب
- مش هصاحب محجات بتلبس سكيني تاني ابداً .
10 -عن التعليم :
- عايز تتعلم حاجة يأما self study علي النت او روح مكتبة او اكاديمية متخصصة ومستقلة متدخلش مدرسة ولا جامعة ولا تربط نفسك بنظام تعليمي .
- ممكن متكملش تعليمك علي فكرة ولا يكون معاك شهادة بس too late انا اتخرجت . عماتاً اهي اتكتبت لعل حد ياخد بنصحتي .
- كسبت حتة ورقة اسمها الشهادة ، والورقة دي بتفرق مع ناس كتير وبتحدد حاجات كتير في بلدنا ، بس خسرت نفسي .
11 - عن اسلوب حياتي :
- خوفي مش من مباديء وافكاري ، انها تكون علي خطأ او تحطني ضد التيار ، ولكن خوفي كله اني اخسر نفسي وسط الواقع والضرورات والتحلّي بالمرونة والتنازلات اللي بقدمها من وقت للتاني .
- انا مش بنمتي لحاجة ومش هتحط في قالب ومش مسؤل عن اي حاجة "مش بإختياري" . كسمكو كلكو علي فكرة .
-بإسم حريتي المقدسة أُعلن عدم تدخل اي انسان او حيوان ، ملاك او جان ، اله او شيطان في إرادتي الحرة من الان فصاعداً ...
-كما أعلن عدم مثولي لاي من القوانين والاعراف والعادات والتقاليد المُستعبدة وعدم مرافقتي لاي شخص من متبعيها ...
12 - عن الزواج :
- ممكن متتجوزش علي فكرة عادي يعني ما فيه ناس مبتشربش شاي وقهوة زيك .
- الجواز في مصر هو ان واحد محروم عايز ينام مع واحدة خايفة تعنس ..
- هناك فرق كبير بين مراتك او صاحبتك وبين زوّجتك ..زوجتك هي المكمل الوجودي لك في العشق...لكل كائن ذكر عاقل او غير عاقل في هذا الكون "زوجة" ، كما لكل انثي "زوج" ..ويجب علي كل زوج وزوجة ان يبحثو عن بعضهم البعض ...ولكن احنا كرجال لا نبحث عن زوجاتنا بل بنستسهل ونبحث عن "كُس وخدّامة" ثم نُطلق عليه اسم "مراتي"عشان نريّح بالنا وضميرنا ومنحسش اننا بنعمل حاجة غلط ..
اما المرأة فهي ايضاً بتستسهل وتبحث عن ضل راجل ولا ضل حيطة او ما يسمي ب"بدل عنوسة" ..كما انّ بعضهن تبعن انفسهن واجسادهن من اجل المال والشقة والستر والغطي كالباغية ثم تذهب إلي مأذون شرعي ليزوّجها علي الزبون وتظل مرتاحة البال ..اغلب الناس بيقضو حياتهم وهما مش عارفين مين وفين ازواجهم الحقيقين او ما يسمي بتوأم الروح !...ولكن بسبب ثقافة "الكُنافة الوجودية" التي تقتضي علي المرء ان يعيش حياة نمطية مثل اي حيوان يبحث عن ظروف المعيشة المُناسبة له ، فهم يقبلون بأي بديل عن ازواجهم / زوجاتهم...واللي يغيظك انهم بيسمو البديل دا زواج شرعي ...اللهم عليك بهم فإنهم يخربون تناغم الكون ...
- الزواج الحقيقي هو الحب ولم يفُسد صدق الأخلاق والمقاصد والعلاقات إلا بالزواج الكهنوتي عن طريق "مسجد ومأذون" ، لأنه قتل الحب بأن أحاله على المعبد و لم يُحله على القلب. #مبغي_المعبد
13 - من طالب خروف ماشي في القطيع ، لمواطن مسلوق في بيروقراطية المنظومة ، لموظف عبد عند مستعمري ثروات البلاد ..هاخد حريتي امتي ياولاد الوسخة !..
14 - من 4 سنين كنت فاكر ان رواية عزازيل اتكتبت عشاني لانها بتلمس روحي وبتثير ازمتي الوجودية وكل كلمة مكتوبة فيها بقولها لنفسي كل يوم ، كنت فاكر ان هيبا كتب المخطوطات دي عشاني انا ، كنت فاكر انه ممكن يكون احد جدودي خاصتاً لما عرفت اني من اصول يونانية بالاضافة إلي اني صعيدي زي هيبا ...ولكن لما قريتها للمرة التانية السنادي عرفت ان القاسم المُشترك بيني وبين هيبا اننا احنا الاتنين عندنا Bipolar disorder المرض اللي اصاب دافنشي ومصطفي محمود واصاب كتير من الفنانين والادباء ، لعنة وتمن بتدفعه مقابل فنّك ، بالاضافة الي ان انا وهيبا عندنا عزازيل جوّانا ومع التقدم العلمي اتعرف بإسم الوسواس القهري ...
15 - عن الموت :
- لو مفيش سبب يخليك تعيش ؟ طيب مهو مفيش سبب يخليك تموت !
- هو انا المفروض اعيش عشان كدا كدا ميت ولا اعيش عشان هموت ؟
- تعرف ايه عن الموت ؟ ، لا أُصدق ما يُروي لي عنه "انه راحة من نار الدُنيا وسجنها" ، وفي نفس الوقت لا اصدق انه عذاب ، عماتاً انا توّصلت لتفسير بسيط للموضوع دا وهو : لما تكون قاعد علي قهوة بتقرأ رواية ليوسف زيدان ، وبتستمتع بالنشوة اللي حاسسها وانتا بتشرب قهوة فرنساوي "بحليب" ، والجو جميل وبتتمزج بأم كلثوم ، وكراسي القهوة خشب ، وحاسس بالنوستالجيا ...ساعتها تقدر تقول علي نفسك كلمة "حي" ..بتقول لنفسك الحمدلله انا حي ...وتعرف يعني ايه حياة ...اهو الموت عكس كل دا ، الموت يعني انتا فقدت حياتك ومفيش نشوة هتحس بيها تاني ، مفيش حب ولا لذة جنسية ولا تذوّق ...اعتقد ان الموت كتعريف "هو عدميتك المقابلة لوجودك في المكان اللي اسمو ال"limbo او البرذخ" وبلاش تريقة علي التعريف الغريب اللي توصلتله دا ..
16 - عن الاحزان :
- اسعد لحظات الحياة كانت لما كان ابويا عايش وكنا كُلنا نتفسح ونزور قرايبنا وناكل شاورمة ونشرب عصير مانجة من ابوحيدر ، مفيش سعادة علي ضهر الكوكب التعيس بالشكل دا تاني لانك حسيتها في اول سنوات حياتك ومكنتش تعرف انك هتحسها تاني ..وحتي لو فيه سعادة تاني فمش هتبقي بنفس قوة وجمال اللحظات دي ، كل حاجة في الدُنيا بتخلص ، تقبّل هذا الامر وبطل توجع قلبك علي الفاضي واستسلم ، مش شرط تقعد ترهق قلبك وعقلك في محاولة لتفسير الاشياء ....
- استمتع بالخرا لان القادم اكثر خراءً ...
- الدعاء مش هيرجعلك ابوك تاني ومش هيجبلك السعادة ومش بيحل اغلب المشاكل . #مُسلّمة
- مش مُدرك ابويا راح فين بعد الموت ولا عارف اذا كنت هقابله تاني ولا لأ .
- لازلت مقتنع ان الانسان جاي هنا ليشقي ويعُذّب .
17- علاقاتك بالبنات الشمال اللي قايمة علي الشرمطة "مضيعة للوقت والفلوس" واهدار لاهدافك ، وهروب من المسؤليات والواقع بطريقة شهوانية وتعطيل لمشاغلك الوجودية والامتحان اللي انتا بتمر بيه في الدنيا اللي هو المفروض يأهلك لاخرتك ..
18 - سواقين التكاتك والميكروبصات والناس بتاعة اوكة واورتيجا وعبده موتة وقلب الاسد وكل ولاد المتناكة دول مش وحشين ولهم
حقوق زيك بالظبط .
19 - اشعر بأن الله اختارني لمهام معين اكبر من كل اللي بيحصل حوالية ، لا اعرف ما هو ! ، وهذا سبب عذابي وازماتي النفسية ، فعندما انظر الي شريط حياتي ، اجد ان كل محاولاتي في ان اصبح انسان تافه وان اشعر بدفء وإستقرار نسبي وان اعيش حياة نمطية اشعر فيها بسعادة مزيفة بائت بالفشل ...لعلي اعرف لما انا هنُا يوماً ما ، ولعلي اصير يوماً ما أريد ! ...
20 - الحُب المليء بالتقلبات والشهوات هو هروب من المسئولية والواقع الأليم "فتجنبه" ...
21 - الجنس مش نجاسة ، دا علاقة روحيّة ، ومفيش مانع من وجود علاقة جنسية بينك وبين اللي بتحبها . شرط توافق القلبان في العشق والكينونة الانسانية .
22 - Save yourself for the right person وان حتي مجاش ادينا عملنا عملنا حسابنا ياناس وان حتي مجاش "علي رأي يسرا الهواري"
22 ونص : انا اتولدت عشان اكون فنّان #يقين
