حتي لو مكنش اتربي عليهم ..

انا أمام تيار نمطي يسمي نفسه التيار الاخلاقي ، تيار الفضلاء والمتدينين ، التيار المحافظ ، تيار عيش عيشة اهلك ، تيار العادات والتقاليد ، تيار احنا اتربينا علي كدا ...
ومعنديش ادني مُشكلة معاه ، التيار دا هو اللي بيفتعل المُشكلة مع الاخرين الغير موالين لفكره ونمطه الحياتي ...
بنظرته العدائية للمخالف لرأيه وافكاره ، دايماً شايف نفسه موّكل من الله بتطبيق اخلاقياته وفضائله علي الاخرين ، وفرضها عليه ، وشايف ان المخالف لعاداته "بايظ وقليل الادب" رغم ان معظم القيم والعادات التي يدعو لها لا تختلف عن اي قيم او عادات اخري في مجتمع آخر ، جميعها معايير اخلاقية نسبية في صحتها ، ولذلك ان قرر شخص الارتباط بعادات وقيم ومباديء اخري غير المتوارثة ومخالفة للتربية اللي اترباها ظناً منه ان فيه قيم اخري بتمثل ثقافته ، وكنوع من تطويره لذاته ، مش بيلاقي ساعتها من ما يسمون بالفضلاء والاخلاقيين غير النعت بال"لا اخلاقية"..

وفيه تيار تاني انا شخصياً مؤمن بيه اكتر ، مثقف وفاهم ان الموضوع اكبر من كدا ، شايف ان المعايير الاخلاقية ملهاش علاقة باختيار الثقافة المناسبة والملائمة ليك ، ملهاش علاقة بلبس او عادة مُعينة تختلف عن العادة المُتوارثة ، مؤمن ان اختياراتك حتي لو تتعارض مع عيشة اهلك مينفعش يتقال عليها "لا اخلاقية" ، مؤمن بتطوير انماط الحياة وبالاتيكيت والخصوصية والحرية حتي لو مكنش اتربي عليهم ..