بفرض ان الكلام اللي في الصورة المُدرجة دي حقيقي ...
طيب خلونا نفكر شوية ..اعلم ان فيه مدارس بتدعو لعدم التفكير في الامر الالهي "بفرض ان إعفاء اللحية اصلاً امر الهي ! " ... ولهم طبعاً رأي يُحترم رغم اني مش معاه ومش بعرف امشي في الدين بالطريقة دي "للاسف" يمكن عشان الناس ازكي مني شوية او أفْهَم مني..لكن انا مش بعرف امشي بطريقة "ان الامر الالهي او النبوي مش محتاج لتفكير" اي انه هو فقط مجرد خضوع واستسلام لله" ..مقولناش حاجة ونعم بالله ...بس اعتقد ان دا في الامر الالهي الصريح اللي مفيهوش تأوييل او إجتهادات ... النص الصريح من القرآن او السنة ....
طيب مبدئياً الامر او النص الصريح من القرآن والسنة زي ايه ؟ ...
زي "لا تزنوا" ، "لا تشربوا الخمر" .."لا تسرقوا" ..الخ ...
كلها امور بتدعو للفطرة السليمة مش محتاجة لشيوخ او قساوسة او معرفة دينية قوية وعلم شرعي عشان تعرف انها امور خبيثة وضد فطرة الانسان وحياة الانسان لا تستقيم معها ..
لكن بالنسبة لموضوع "إعفاء اللحية" ؟ ...اعتقد انها وردت في حديث بيقول اعفوا اللحي وحفوا الشوارب ..
بفرض صحة الحديث وبفرض انه لغوياً "امر" ..وما آتاكم الرسول فخذوه وما نهاكم عنه فأنتهوا ..فهو بالتالي امر "إلهي" لا يجوز عصيانه ومن عصي الامر دا فهو يعتبر "عاصي او مُذنب" ..والعاصي والمذنب ان لم يستغفر فهو هيتعذب في جهنم...والنقطة دي مُهمة جداً وهرجعلها في آخر الموضوع ...
كما قال احد اعلام الفكر السلفي ان تربية اللحية هو "فرض صغير" اما الصلاة فهي "فرض كبير" ..لما كان بيحاول يشرح الموضوع دا للعامة او البسطاء ...
طيب ! ..خلينا ورا الدليل حيث يقودنا وفي الآخر هقول رأيي ..
في الصورة فيه 6 اسباب وهي آراء دينية او ما يسمي بإجتهادات تعالو ناخد سبب سبب من دول بالراحة ونناقشه ..من حقنا نناقش الإجتهادات الدينية اعتقد ...
1- هو في الصورة بيقول "تغيير خلق الله تعالي" يعني اللي بيحلق دقنه هو مُغيّر لخلق الله مثلاً كأنه نوع من انواع عمليات التجميل او مخالفة للفطرة اللي الانسان بيتولد عليها ..
طيب ايه المنطقي هنا ؟ ..اشمعني الدقن ؟ ..ليه مش الشنب او الشعر ..ما الاتنين بينمو ..اشمعني لو الدقن اتحلقت فهي تغيير اما الشنب بيتحلق عادي جداً ! وكذلك في الشعر ...
الاجتهاد دا بالنسبالي مرفوض لانه فيه تناقض واضح وصريح ..
2-مخالفة امره صلي الله عليه وسلّم ...بفرض صحة الحديث وصحة الظروف اللي اتقالت فيها..مع مراعاة التغيير الجذري بين الحاضر والماضي والعادات والتقاليد وما يتناسب مع عُرف المجتمع الحديث ..وبمعرفة للاسباب اللي اتقالت فيها الحديث كما سمعت ان تربية الدقن "مُخالفة لليهود والنصاري" ..ماشي مفيش اي مُشكلة رغم التحّفظ علي نقاط كثيرة بس مش موضوعنا ...في الاخر بعد كل دا هنقول انه امر "نبوي" ..ماشي معاك مقولناش حاجة في دي ..
3-التشبه بالمجوس ...هو اصلاً في لسة مجوس ؟ ..حد شاف واحد مجوسي طول حياته ؟ ..هما بجد لسة موجودين ؟ ..ممكن يكونو منتشرين في شبه الجزيرة العربية زمان ..لكن دا ايه علاقته بالحاضر بتاعنا وواقعنا ؟..وبفرض ان المجوس مغرقين البلد ..طيب هل لو هما بقو يربوا دقنهم دلوقتي وبيقصوا شواربهم ..هل النص النبوي يختلف هنا ؟ ..هل هناك خلل ما في الامر النبوي ؟ ...
4-التشبه بالنساء ..بفرض ان واحد بيحلق لحيته ويسيب شنبه ..هل لازال ينطبق عليه انه مُتشبه بالنساء ..هو في ارجل من الشِنبة ؟ ...
5-المجاهرة بالمعصية والاصرار علي المعصية !؟ ..هنا بقي النقطة المهمة اللي كان لازم ارجعلها..المُجاهر بالمعصية والمُصر عليها ان لم يستغفر او ربنا سامحه وغفرله فهو في النار ...
هنا بقي جينا للعمق دا ...سيبك من كل اللي فات ...
خليني اقول رأيي بحيادية وارجوكم اسمعوني من غير تكفيير وياريت محديش يقول عليا مُلحد : انتا مُتخيّل معايا ان في اله او نبي او دين عايزك تربي دقنك لو مربتش دقنك فأنت عاصي ولو فضلت علي المعصية دي هتدخل النار ..
مُتخيل معايا ان دين القيم والاخلاق مثل التسامح والحب ونشر العدل وإعلاء كلمة الله ! ...يجي بعد كل دا يقولك انتا هتدخل النار وتفضل تتعذب سنين طويلة رغم انك ممكن تكون إنسان خُلقه حَسن عشان "زنيت" مثلا .. لا ..عشان "قتلت"..برضو لا ..عشان "سرقت" ..لا .."كدبت" حتي ..لأ ....
لأ هتتعذب ! ...عشان مربتش دقنك !
هناك تعليق واحد:
كلام واقعى .. و مش بيدل على الحاد ولا حاجة ديه وجهت نظر و انا مُتفُق معاك ..
إرسال تعليق