الانثي المصرية

ليست محاولة مني للهجوم علي ستات وبنات مصر ، ايضاً ليست محاولة لتغيير هويتنا المصرية ، او دعوة لتحرر المرأة بشكل لا يتماشي مع عاداتنا وتقاليدنا ، انا شاب من منطقة شعبية وفاهم كل ما يتعلق بمفهوم العفة والشرف ، وكيف يُنظر للبنت في مجتمعنا ، انا فقط متعاطف مع ما يحدث لهم ، انا نفسي مش متخيّل لو كنت بنت في مُجتمعنا المريض دا ، ! كنت هعمل ايه ؟ ياتري كنت هنتحر ؟ ياتري كنت هكتئب ومنزلش من البيت ؟ ياتري كنت هقدر اصمد ضد المُجتمع دا واحارب عشان حقوقي واكون اقوي ؟ .
مش متخيّل اني انزل من بيتنا يقولو انتي ايه اللي بينزلك من البيت ، ولو اتأخرت او شافوني مع واحد يظنو بي الظنون ، او ملبسش حجاب يقولو عليا مش محترمة ، او البس حجاب ولبس محتشم يقولو عليا معقدة ؛
ولما تشوف ازدواجية في المعايير زي مثلاً بنت بتقول انا مش بسلّم علي ولاد غير صاحبي او مثلاً بنت مُحجبة بس كل همّها تعرف كل شباب جامعتها ، او انها تقدر توقع في حبها اكبر كم من الشباب ، بترجع تهاجم البنت .
ولكن الحقيقة الافعال دي من البنت هي مُجرّد نتيجة لخلل في المجتمع - الفكرة كلها ان المرأة وعاء المُجتمع ، لو المُجتمع مُبتذّل ، عاداته سيئة وسلوك وافعال الناس فيه غير حضارية ، ثقافته ضحلة ، ثقافته لا تتعدي الجرايد اليومية ! ، هتلاقي انعكاس لكل دا علي المرأة هتلاقيها شخصية مبتذلة تافهة ملهاش اي قيمة .

   عماتاً دي مجرد دعوة للبنت او الست المصرية عشان تفوق ، دي لو كانت عندها إرادة انها تفوق ! ، تفوق من المعايير المزدوجة والمرقعة اللي عايشة بيها ، تفوق من فكرة انها عايشة كآلة جنسية او خدامة  - او ان كل هواياتها لم الشباب حولها او ازاي ترضي  نفسها ، او إن كل إهتمامتها تكون بجمالها الخارجي فقط - تخرج من حفرة بتكون عايشة فيها بأسلوب حياة يسمحلها فقط بإن كل تفكيرها يكون في كيفية البحث والايقاع بالعريس وكيفية إسقاط تهمة العانس من علي أكتافها والدخول الي حياة الجواز ظناً منها ان الراجل دا اخر احلامها واخر طموحها ومفيش حاجة تقدر تحصل عليها في الدنيا احسن من كدة ، بس هي متعرفش ان الحياة اكبر من عريس واكبر من الجواز - وهي متعرفش ايضاً انها المفروض نص المُجتمع ، وعلي أكتافها مسئولية بناءه والمُشاركه في جوانبه .

- معظم شباب مصر اصبحو مؤخراً متعقدين من بنات مصر ، وانا بتكلم عن الشباب الواعي والمُثقف ، مش بتكلم عن شباب سيس كل تفكيره انه يصطاد البنت او يقف علي الناصية يعاكسها ، بتكلّم عن نوع ارقي شوية من الشباب ، وله نظرة وهدف وطموح ونفسه في انثي تشاركه وتبقي علي قدر من المسئولية وتساعده ويساعدها علي تحقيق اهدافه واهدافها .

لكن الشاب المثقف حالياً نظرته للمرأة المصرية كإنها ملهاش وجود او زي ما تكون علبة كُشري بالنسباله ، مجرد اكلة شعبية سوقية جداً قيمتها مش كبيرة وهي مجرد مصدر تسلية او إشباع للشهوة فقط ، اصبح عنده نظرة سلبية للمرأة خالية من الاحترام وبقي يقول مش هتجوّز ومش عايز اتجوّز ولو اتجوّزت مش هتجوّز مصرية ، لانه طبعاً شايف معايير خاطئة تماماً للزواج ، وخارج الهدف اللي المفروض تتكون بيه مؤسسة الزواج ، بقي يشوف المتجوزين مش متجوزين ، بقي يشوف البنت بتحب فلوسه ، بتحب شكله ، بتحب دماغه ، بتحب منظرها وهي معاه ، بقي يشوف مراته متجوزاه عشان يصرف عليها سد خانة مش اكتر ، ضل راجل ولا ضل حيطة ،  لكن عمره ما شافها بتحبه ، عمرها مشاركته في اي حاجة ولا اهتمت بيه ، بقت كل فكرتها عنه انه الراجل اللي "هيستتها" ويخليها مش عانس ولذلك هي بتضطر تمثل انها مُهتمة بيه وبتحبه ، لان مفيش خيار تاني قدامها .

-عشان كدة البنت لازم تسأل نفسها الاسئلة دي :

انا عايزة من نفسي ايه ؟ انا ايه اللي بيرضيني ؟

انا ايه تصوّري للهدف اللي انا اتخلقت عشانه ؟ انا ايه تصوري للدنيا وغايتها وحكمة وجودي فيها ؟

انا ايه الخطوط الحمراء بالنسبالي ؟ ايه نظرتي للصواب والخطاً ؟

ايه معاييري ؟ ايه الحدود اللي هقف عندها في طلبي للذة ؟ وهل عندي حدود اصلاً ؟

طيب انا بخاف من ايه ؟ طيب انا بخاف اصلاً ؟

ايه الشيء اللي بحسب له الف حساب ؟

لو كان الشيء دا هو راحتها ولذتها واكلها وشربها ولبسها ومظهرها وتأثيرها علي الناس، فهي واقفة عند نفسها ،  مش هتتخطي اكتر من نفسها وهتفضل كدة "كائن كل همه اللبس والعطور والدلع والمرقعة ومحاولة لم اكبر كم من الشباب المعجب حواليها وكل همها تسمع كلام حلو عن لبسها وقد ايه هي جميلة ، طبعاً دا كُله قبل الجواز ، وبعد الجواز آلة جنسية وخدامة وارنبة وبعد كدة تنتظر الموت في إكتئاب وتفضل تندب حياتها وماضيها وعيشتها في حزن .

انا عارف ان مجتمعنا السبب هو اللي مهّمِش البنت والست المصرية مش عايز يخرجهم برة المطبخ والبيت بس دا مش معناه الاستسلام بالشكل دا .

العبي مازيكا ، مارسي هواية ، اشتغلي شغلانة بتحبيها ، اكتبي ، اتكلمي ، غيّري ، اعملي اي حاجة لها قيمة دا انتي روح الدنيا ، دا انتي السبب واصل الوجود .

 انتي الحياة ، سيبك من ال بوي فريند ولا العريس ، هيجي هيجي ، هيجي الشخص الصح لو كنتي في المكان الصح ، واحد بيقدرك وبيقدر اهدافك وبيتعامل معاكي ك"انثي" مش كل همه يتفشخر بيكي قدام صحابه او ياخد غرضه الجنسي منك ! .

بس دا هيحصل لو انتي بقيتي "نفسكِ" وعايزة تعمليِ حاجة لها قيمة ، وبقيتي مُستقلة بذاتِك ومبِتخليش حد يتحكم فيكيِ ، احترمي نفسِك وقدري ذاتِك ، حاربي عشان حقوقِك .
_______________________________

- نادراً لما تلاقى بنت بتقرأ او بتعمل حاجة ايجابية او لها اي قيمة  ، حتى شغلها مجرد مرحلة انتقالية من الجامعة للعريس او بمعني اخر هي مُجرد بتوسع دايرة البحث عن رجل.

- بنات اوروبا تحس انهم جدعان بغض النظر عن معاييرها الغربية مش بنتكلم دلوقتي في النقطة اللي تمس الشرف والحياء في مجتماعاتنا ! ، مش هنتكلم في غشاء بكارة ، ولاحقاً هقولكم ان العفة مش غشاء بكارة زي ما إحنا فاكرين - بس تحس ان البنت الاوربية منهم تفوت ف الصخر و تسافر و تروح و تيجى و تشتغل و تسكن لوحدها - اما عندنا البنت المصرية عندها غباء اجتماعي الي حداً ما ومبتعرفش تتصرف ، تحتاس لو اتوكلت لها مسؤلية ، مبتعرفش تعتمد علي نفسها بشكل كبير - لانها اتعوّدت علي كدا .

-عشان كدة نظرتي للبنت الاوربية كانت دايما نظرة مثالية سواء الجمال الداخلي زي ما اتكلمت عنه فوق او الجمال الخارجي ، والجمال الخارجي بالنسبالي مقصدش بيه الملامح علي الإطلاق ولكن اقصد بيه الانوثة مش الطفولة والمياعة زي البنت المصرية ، البنت الاوروبية يعني رقة وفَهم للحدود وهي اللي بتضع الحدود دي ومبتسمحش لحد يتخطاها سواء كانت الحدود دي هية مجرد لمسة او فقد عذرية ، المهم انها حطت حدود مُعيّنة ومباديء اعتنقتها ، احلي ما فيها فهمها لكونها انثي ، دايماً تحس انها مُستقلة بذاتها مش كل حاجة بابي ومامي مش كل حاجة هشوف صحابي بيعملو ايه واعمل زيهم ، او كل خوفها وهمها الناس هتقول عليا ايه .

طبعاً في بنات مصريّة فيها صفات جميلة ، وتكاد تكون اكثر ثقافة ووعي وجمال داخلي وخارجي من البنت الاوروبية ، ولكن انا بتكلم عن شريحة كبيرة اوي في مجتمعنا ومش محتاج حد يقولي بس علي فكرة في بنات مصرية مُختلفة ، انا مش مُغيّب عن الواقع .

المُشكلة ابعادها كبيرة اوي  ، ولها علاقة بالمجتمع والاصدقاء والبيت والتربية والاهل والاخ - والزواج اللي بقي صعب اليومين دول ؛
انا مش بنفي ان الرجالة والشباب لهم دور كبير في ان الانثي المصرية تبقي بالشكل السطحي دا - مش بنفي ان شريحة كبيرة من الشباب اصبحو اكثر سطحية - مش بنفي التحرشات والنظرات الدونية للبنت والست في مجتمعنا - ولكن البنت لازم تتحمل العبء ولازم تحارب عشان حقوقها لو حاسة ان لها حقوق ، لو حاسة ان حياتها ذات قيمة ، لو حاسة انها إنسانة ، اما لو ستاتنا وبناتناعاجبهم اللي هما فيه دا ومستسهلينه - مش فاهمين انا بقول ايه ! - دا بقي موضوع تاني ، وخطورته اكبر واكبر . ودي تبقي مُصيبة .

hosny ahmed