لا تخرج قبل ان تقول سبحان الله !

ازاي تعجب المواطن العربي؟

اكتب احاديث وادعية وآيات قرآنية علي حسابك علي اي نوع من انواع مواقع التواصل الاجتماعي ، وطبعاً الكلام دا مش المفروض انه يكون في الصلاة ولا في خلوة ! ، لأ طبعاً ! علي الفيس بوك وامام الجميع لان اهم حاجة الناس تعرف قد ايه انتا مُتدين ، عشان يزداد اعجابهم بيك وعشان يُقال عليك مُحترم ، زي ما كايروكي قالوها "عيش للناس"
مستني ايه من شركة زي كوكاكولا و vocal زي امير عيد وباند كوميرشيال زي كايروكي وكلمات اغنية بالاعتماد علي مُفردات التنمية البشرية غير انها تخرّج كلمة بالمعني السطحي دا "عيش للناس" !! ، ال Mix دا لازم يخرّج اغنية مُبتذلة زي دي !!

 او انك تغيّر صورة البروفايل بتاعك وتخليها مُصحف ، حتي يعرف كل من يدخل البروفايل وكأنه مثلا يري علامة او اشارة "احترس صاحب هذا البروفايل يندرج تحت تصنيف مُعيّن" وهو "المُتدّين" ، كأنك بتقول لكل اصدقائك علي فكرة "انا مُتديّن"....
 عامتاً مش هتكلم في التصنيفات المُضحكة دي لاني اتكلمت عنها مُسبقاً ، هذه التسميّات لا تدل الي علي جهل شامل بكل مفاهيم الدين والانسان ، لان كل انسان بطبعه فاجر ومُتديّن ، والفكرة في الانسان هو انه ازاي يقدر يرجّح الكفة اللي عايزها..

مثلاً عمرك حسيت انك لما بتكتب الاحاديث والادعية والآيات القرآنية دي عندك علي الفيس بوك وطول الوقت بتعملها شير في الهوا وتنشر الكلمات العظيمة دي بدون ما تحسها ، انك كدا فعلياً بتقلل من معني الكلام دا ، ظناً منك انك بتقوم بنشر الدين الاسلامي علي الفيس بوك ! اي وسيلة ساذجة تلك لنشر الاسلام او كلام النبي مُحمد ! ،
ايضاً هو مش المفروض انك لما تعوز تدعو الله وتسأله المغفرة او الرحمة مثلاً ، يكون في خلوة ومن القلب وبصدق ! ، مش المفروض الاحاديث والآيات القرآنية تُقرأ في خلوة وفي تفكُّر وتدبّر لمعانيها ! ، ليه بتخلّي علاقتك بالله يشارك فيها آلاف الاصدقاء!  معملتش حساب ان النفس بتحب الرياء مثلاً ؟

وبرضو متنساش تنشر "صوّر لإسم "الله" علي ثمرة البطاطس او الطماطم ولا تخرج قبل ان تقول سبحان الله ! ...والمُضحك في الامر ان كلمة سبحان الله هنا مش علي الاعجاز في خلق الثمرة بعد التأمل في خلقها ، لا طبعاً الاعجاز هنا في انك تشوف اسم "الله" مكتوب علي الثمرة !!!! ..
فعلياً دا استهزاء بالله عز وجل ! وبآياته ، انك تترك التدّبر والتأمل في اعجازه وقدرته علي خلق مثل تلك الثمرة وخلق الظروف الاولي لنشأتها وترّكز علي الاسم المكتوب علي الثمرة ! ، فعلياً المُعجزة هي في خلق ثمرة البطاطس او الطماطم وتوفير الظروف المُلائمة لهما ، وانها من بذرة تتحول الي ثمرة وليست المُعجزة في انك تري اسم الله علي تلك الثمرة ! ....
لا اعتقد ان الله سبحانه وتعالي يحتاج ان يبرّهن علي وجوده بهذه الطريقة الساذجة ! ..

وانشر صوّر لسُحب قررت انها ترسم إسم النبي مُحمد عليه الصلاة والسلام ، ولما قررت تعمل كدا مكتبتوش بالانجليزي ولا اي لُغة تانية مثلاً ، لأ دايما المُعجزات مخصوصة للمواطن العربي ! ...

كأنك مش شايف آثار الله الموجودة حولك !! ، مش شايف اعجازه !! ، مش شايف خلقه !! ، محتاج لدليل او إثبات ، مش بتتدبّر في السيمفونية الكونية والتناغم اللي فيها من طبيعة وزرع وثمار ، لأ كل اللي شايفه واللي يهمك هو الاسم المحفور علي البطاطس او الطماطم بفعل فاعل ، كأنك مش مؤمن بيه ومحتاج لدليل مادي قاطع علي وجوده !

انشرها بقدر حبك للنبي فإن لم تنشرها فأعلم ان ذنوبك هي ما منعتك ! ودي اسهل عباره عشان تخلّي عدد زوّار صفحتك يزيدو ، تجارة الدين حتي في مواقع التواصل الاجتماعي ، هي تجارة بكلام النبي وحبه من اجل الحصول علي اكبر عدد من ال likes وزوّار لموضوع او صفحة مُعينة ...

انا كل يوم بقعد علي الفيس بوك واقول  "ازاي بني ادم ومش بيفكّر ؟ " لا تخرج قبل ان تقول سبحان الله !"